Ўзбекистон туризм салоҳиятининг намойиши

Токиода бўлиб ўтган «JATA Tourism Forum&Travel Showcase – 2014» халқаро сайёҳлик кўргазмасида Ўзбекистон миллий стенди намойиш этилди. 

Тарихий ва маданий ёдгорликлар сони бўйича жаҳонда етакчи ўринлардан бирида турувчи Ўзбекистоннинг сайёҳлик салоҳияти изчил ривожланиб бормоқда. Мамлакатимизда ҳукм сураётган тинчлик-осойишталик, фаровонлик бу борада муҳим омил бўлиб хизмат қилаётир. Янги сайёҳлик йўналишлари ташкил этилиб, юртимизга келаётган сайёҳлар оқими кўпаймоқда. Бу Президентимиз Ислом Каримов раҳнамолигида туризмни ривожлантириш бўйича амалга оширилаётган кенг кўламли ишлар самарасидир. «Ўзбектуризм» миллий компанияси халқаро сайёҳлик кўргазма ва ярмаркаларида фаол иштирок этиб, мамлакатимизнинг бу борадаги салоҳиятини кенг намойиш қилмоқда. 

«JATA Tourism Forum&Travel Showcase – 2014» Осиё-Тинч океани минтақасининг нуфузли йирик сайёҳлик кўргазмаларидан бири ҳисобланади. Ташкилотчиларнинг фикрича, унда ҳар йили дунёнинг 150 дан ортиқ давлатидан мингга яқин экспонент иштирок этади. Жорий йилда кўргазмада Европа, Осиё ва Америка мамлакатларининг сайёҳлик фирмалари, темир йўл ва авиакомпаниялари, меҳмонхона ва ресторан бизнеси намойиш этилди. 

Ўзбекистоннинг миллий анъаналаримиз ҳисобга олинган ҳолда тайёрланган миллий стенди чиройли дизайни ва мазмуни билан иштирокчилар эътиборини тортди. Стенд “Ўзбекистон ҳаво йўллари” миллий авиакомпанияси, “Ўзбекистон темир йўллари” давлат акциядорлик компанияси, «Dolores Travel», «ABDA Travel», «Sheherezade Voyages», «Asia Adventures», «Sole Vita» ва бошқа етакчи сайёҳлик операторлари экспозицияларини ўзида мужассам этган. Иштирокчилар эътиборига мамлакатимиз қадимий шаҳарларининг диққатга сазовор жойлари ҳақида ҳикоя қилувчи буклет ва фотоальбомлар, халқ амалий санъати намуналари ҳавола этилди. Бошқа давлатларнинг вакиллари Ўзбекистонда миллий сайёҳлик инфратузилмасини такомиллаштириш бўйича амалга оширилаётган кенг кўламли ислоҳотлар самаралари билан таништирилди.