Ўзбекистон маҳобатли обидалари ва замонавий кўрку таровати билан ҳар қандай сайёҳни ҳайратга солади

Самарқанд шаҳрида БМТ Жаҳон сайёҳлик ташкилоти Ижроия кенгашининг 99-сессияси бўлиб ўтмоқда. 

ЎзА мухбирлари анжуман иштирокчиларининг айримлари билан суҳбатлашди. 

Ким Ки Хонг, Корея Республикаси Маданият, спорт ва туризм вазирлигининг сайёҳлик бюроси бош директори: 

– Ўзбекистоннинг сайёҳлик салоҳияти тобора юксалиб, имкониятлари кенгайиб бормоқда. Сессиянинг очилишида Президент Ислом Каримов иштирок этгани ва нутқ сўзлагани анжуман нуфузини оширди. Ўзбекистон ўз жозибаси ва гўзаллиги билан жаҳон сайёҳларини ҳайратлантириб келаётган мамлакатлардан биридир. 

Президент Ислом Каримов маърузасини катта қизиқиш билан тингладим. Давлатингиз раҳбарининг Ўзбекистон халқи фаровонлиги йўлида кўрсатаётган ғамхўрлиги таҳсинга лойиқ. Буюк ипак йўли марказида жойлашган Ўзбекистонга, хусусан, Самарқандга келаётган сайёҳлар сони мунтазам кўпайиб боришига ишонаман. 

Самарқандга ташрифимиз давомида “Афросиёб” музейида бўлдик. У ердаги деворий суратлардан бирида Афросиёб ҳукмдорининг турли мамлакатлар элчиларини қабул қилиш маросими акс этган экан. Улар орасида Чосон (Корея) элчисининг ҳам борлиги халқларимиз ўртасидаги муносабатлар илдизи қадимийлигидан далолат беради. Бугунги кунда ҳам мамлакатларимиз ўртасидаги алоқалар юксак даражада ривожланиб бораётгани бизни жуда қувонтиради. 

Шерри Сибанда, Зимбабве Сайёҳлик ва меҳмондўстлик саноати вазирлигининг халқаро туризм департаменти директори: 

– Президент Ислом Каримов ўз маърузасида нафақат Ўзбекистоннинг, балки жаҳон сайёҳлик саноатига оид жуда муҳим ва фойдали маълумотларни келтириб ўтди. Маърузани тинглар эканман, Ўзбекистон сайёҳлик соҳаси ривожи доимий эътиборда эканига ишончим комил бўлди. 

Даниэла Гарза Риос Эйченне, Мексика сайёҳлик вазирлигининг департамент директори: 

– Президент Ислом Каримов маърузасида таъкидлаганидек, туризм ривожланган мамлакатда бағрикенглик ҳам мужассам бўлади. Сайёҳлик қалбимизга бағрикенглик ва эзгулик туйғуларини сингдиради. Мамлакатингизда барча соҳалар қатори сайёҳликни ҳам тараққий эттиришга қаратилаётган улкан эътиборга ҳавасимиз келди. 

Ўзбекистоннинг халқаро майдондаги ўрни мустаҳкамланиб, нуфузи тобора ошиб бораётганини алоҳида таъкидлашни истардим. Мамлакатингиз улкан сайёҳлик салоҳиятига эга. Шу боис дунёнинг кўплаб одамлари бу ерга саёҳат қилишга интилмоқда. Ўзбекистоннинг бой тарихи, маданияти, санъати, маънавий мероси билан яқиндан танишиш имконига эга бўлдим. Ўзбек заминида етишиб чиққан олиму фузалоларнинг жаҳон илм-фани ривожига қўшган улкан ҳиссасини дунё аҳли эътироф этади. Айниқса, Амир Темур ва темурийлар даврида амалга оширилган бунёдкорлик ишлари барча замонлар учун ибратлидир. Юртингиздаги маҳобатли иншоотлар халқингиз ақл-заковатининг маҳсули сифатида дунёни ҳайратга солиб келмоқда. Ана шундай буюк мерос ворисларининг ўз аждодларига кўрсатаётган эҳтироми ҳар қанча таҳсинга сазовор. 

Бугунги кунда сайёҳлик замонавий иқтисодиётнинг энг муҳим тармоқларидан биридир. Мамлакатингизда ўтказилаётган халқаро сайёҳлик кўргазма ва ярмаркаларида фаол иштирок этиб, бу соҳадаги ҳамкорликни ривожлантирмоқчимиз. 

Ҳамад Абдулазиз Алшайх, Саудия Арабистони сайёҳлик ва қадимийлик комиссияси вице-президенти: 

– Ўзбекистонга келиб мамлакатингиз ҳақидаги тасаввуримиз янада бойиди. Бу диёрда ҳар соҳада юксак тараққиётга гувоҳ бўляпмиз. Мамлакатингиздаги, хусусан, Самарқанддаги маҳобатли қадимий обидалар билан замонавийликнинг ажойиб тарзда уйғунлашиб кетгани хотирамда бир умр муҳрланиб қолади. Бу қадимий шаҳарларда ҳаёт қайнаётгани, ўтмиш ва замонавий цивилизация ёнма-ён яшаётганидан ҳайратим чексиз. 

Ўзбекистон замини асрлар давомида Буюк ипак йўли орқали Шарқ ва Ғарбни бир-бири билан боғлайдиган робита бўлиб хизмат қилган. Турли цивилизация ва маданиятлар ўзаро туташган муҳим чорраҳа, умуминсоний тараққиётга беқиёс ҳисса қўшган ўлка сифатида танилган. Ўзбекистон халқи – буюк зотлар авлоди, бетакрор мерос соҳиби. Бу ерда етишиб чиққан олимлар алгебра, астрономия, тиббиёт, география, меъморчилик, геодезия, геология, филология каби кўплаб фанларга асос солган. Бугун ана шундай пойдеворга таяниб, Ўзбекистон эркин, мустақил ва фаровон келажагини қуриш, жаҳон ҳамжамиятида муносиб ўрин эгаллаш йўлидан дадил одимламоқда. 

Хейке Бремер, Германия Бундестаги аъзоси: 

– Ўзбекистонга келганимдан қалбим қувончга тўлди, руҳим кўтарилди. Бухоро, Самарқанд, Хива шаҳарларида, Фарғона водийси, хусусан, Андижон шаҳрида бўлдим. У ердаги бетакрор тарихий обидалар, миллий либос ва ҳунармандлик буюмлари ҳар қандай кишини ҳайратга солади. Хивадаги Ичан қалъани кўриб, маҳобатли миноралар орасида ўзимни гўё мўъжизалар оламига тушиб қолгандай ҳис этдим. Бир-бирига туташиб кетган гўзал обидалар киши хаёлини узоқ ўтмишга етаклайди. 

Бухорога сафарим ғоят унутилмас бўлди. Бу қадимий шаҳардаги обидалар шу қадар мустаҳкам қурилганига ҳайратландим. Барча шаҳарларингиздаги ўзига хос меъморий обидалар Ўзбекистонда миллий меъморчилик азалдан юксак даражада тараққий этганидан далолат беради. 

Ўзбекистон хотин-қизларининг билим ва салоҳияти жуда юқори. Мамлакатингизда уларнинг ҳар соҳадаги фаолиятини ривожлантириш, илғор ғояларини қўллаб-қувватлаш бўйича амалга оширилаётган ишлар эътиборга молик. Давлатингиз томонидан аёлларни эъзозлаш, унинг оила ва жамиятдаги мавқеини юксалтириш, салоҳиятини юзага чиқаришга қаратилаётган эътиборга ҳавасим келди. 

Сержио Чамбал, Мозамбик сайёҳлик вазири ёрдамчиси: 

– Регистон мажмуаси, Амир Темур мақбараси, Мирзо Улуғбек расадхонаси каби мўъжизаларни зиёрат қилишга мушарраф бўлганимдан ғоят бахтиёрман. 

Ўзбекистон сайёҳлик соҳасининг келажаги порлоқ. Мамлакатингизда туризмнинг кўплаб йўналишларини ривожлантиришга алоҳида эътибор қаратилаётир. Амалга оширилаётган бетимсол ишларни ҳайрат ва ҳавас билан кўздан кечирдим. Ўзбекистонда мавжуд сайёҳлик салоҳиятидан самарали фойдаланиш борасида улкан ишлар олиб борилаётгани таҳсинга лойиқ. 

Жаннатмонанд бу заминда етиштирилган ширин-шакар ноз-неъматлардан баҳраманд бўлдим. Уларнинг таъмини ҳеч қачон унутмайман. 

Зелимир Крамарич, Хорватия сайёҳлик вазири ёрдамчиси: 

– Ўзбекистоннинг тарихи жуда бой ва бетакрордир. Мамлакатингиз турли цивилизация ва маданиятлар ўзаро туташган муҳим чорраҳа, умуминсоний тараққиётга беқиёс ҳисса қўшган ўлка сифатида бутун дунёга танилган. Юртингиз тарихини атрофлича ўрганиш мобайнида аниқланган Буюк ипак йўлига оид ноёб маълумотлар тарих, археология каби фанларнинг янада бойиши ва кенгайишида алоҳида аҳамият касб этади. Бу Ўзбекистоннинг жаҳон илм-фани, маданияти ривожида муҳим ўрин тутганидан далолат. 

Ўзбекистон табиатининг гўзаллигига, туризмнинг кўплаб йўналишлари изчил ривожланаётганига ишонч ҳосил қилдим. Буни мамлакатингиздаги замонавий меҳмонхоналар ва дам олиш масканлари фаолияти, шаҳарлараро ҳаво ва темир йўл транспорти алоқасининг яхши йўлга қўйилгани мисолида ҳам кўриш мумкин. Ўзбекистонда чет эллик сайёҳлар учун барча шароит яратилган. Юртингиз БМТ Жаҳон сайёҳлик ташкилотида ўзига хос муҳим ўринга эга мамлакатдир. Буларнинг барчаси Ўзбекистоннинг жаҳон сайёҳлик бозоридаги нуфузи тобора юксалиб бораётганидан далолат беради. 

Мелани Титус, Жанубий Африка Республикаси Сайёҳлик вазирлиги вакили: 

– Ўзбекистон азалдан жаҳонда илм-фан ва маданият марказларидан бири бўлган. Мирзо Улуғбек расадхонаси, Регистон ансамбли ва бошқа кўплаб тарихий ва меъморий обидаларни кўздан кечирар эканман, ўзбек халқининг юксак салоҳияти, маданий ривожига қойил қолдим. Мамлакатингизда аждодларингизнинг бой меросини ўрганиш, тарғиб қилиш, маданий ёдгорликларни таъмирлаш ва асраб-авайлаш, таълим, фан ва маданият соҳаларини ривожлантириш борасида кенг кўламли ислоҳотлар амалга оширилаётгани таҳсинга сазовор. 

Ўзбекистондаги кўплаб маданий объектлар ва қадимий шаҳарлар ЮНЕСКОнинг Бутунжаҳон мероси рўйхатига киритилгани бежиз эмас. Улар ўз таровати билан ҳар қандай сайёҳни ҳайратга солиши шубҳасиз. Ер юзида ана шундай бебаҳо обидалар, юксак меъморлик намуналари борлиги бизни ғоят қувонтирди. 

Тинчлик ва осойишталик барча соҳалар қатори сайёҳлик саноатининг ҳам ривожида муҳим аҳамият касб этади. Зеро, тинчлик бўлмаган юртда тараққиёт бўлмайди. Ўзбекистонда тинчлик ва барқарорлик ҳукм сураётгани, мусаффо осмонингиз, халқингиз фаровон ва саодатли ҳаётдан баҳраманд бўлаётгани ҳавас қилгуликдир. Кўчалар озода, бозорлар тўкин-сочин. Бундан биз олам-олам завқ оляпмиз.