Қизиқарли тақдимотлар ва самарали музокаралар

 

 

Миллий ва халқаро сайёҳлик ташкилотлари, меҳмонхона ва ресторанлар, музейлар, банк хизматлари, суғурта компаниялари ҳамда оромгоҳлар вакиллари иштирок этган ушбу ярмаркада мамлакатимизнинг сайёҳлик салоҳияти ва таклиф этилаётган хизматлар, хушманзара табиатимиз ва ноёб меъморий обидаларимиз акс этган экспонатлар, халқ ҳунармандлиги буюмлари кенг намойиш қилинди. 

– Компаниямиз Словакия, Хорватия, Австрия, Италия, Франция, Буюк Британия бўйлаб саёҳатларни ташкил этиш билан шуғулланади, – деди “Happy Tours” компанияси директори Рок Булц (Словакия). – Ўзбекистонда саёҳатларни мазмунли ўтказиш ва ҳордиқ чиқариш учун барча имкониятлар мавжуд. Тарихий обидалар, самимий меҳмондўстлик, ноёб ҳунармандлик буюмлари, энг асосийси, юртингиздаги тинчлик-тотувлик муҳити бутун дунё сайёҳларини жалб этмоқда. Мамлакатингиз туроператорлари билан ҳамкорлигимизни ривожлантириб, Ўзбекистондан Европага, Европадан Ўзбекистонга сайёҳлар жўнатиш ниятидамиз. 

“Ўзбекистон бўйлаб саёҳат миллий павильони” стендлари ярмарка иштирокчиларида катта таассурот қолдирди. Улар Қорақалпоғистон Республикаси ва вилоятларнинг сайёҳлик салоҳияти билан яқиндан танишди. Тадбир қатнашчилари махсус экспозицияларда ўзбек миллий таомлари ва турли мева-сабзавотлардан татиб кўрди, миллий ҳунармандлик буюмларини харид қилди. Андижон, Бухоро ва Қашқадарё павильонларида сопол буюмлар, ганч ўймакорлиги, қўғирчоқлар каби маҳсулотларни тайёрлаш бўйича ўтказилган маҳорат дарслари, шунингдек, ўзбек миллий либослари намойиши, миллий мусиқа ва рақсларимиз иштирокчиларда катта қизиқиш уйғотди. 

Ярмарка доирасида ташкил этилган “Hosted Buyers” (“Профессионал харидорлар”) дастури истиқболли шериклар ва харидорлар ўртасидаги учрашувларни олдиндан белгилаш, уларга муайян имтиёзлар бериш орқали соҳада ишбилармонлик муҳитини ривожлантиришга хизмат қилади. 

– Ўзбекистон сайёҳлик бозори биз учун ғоят истиқболли, – деди “Media Tourism & Travel” компанияси бош менежери Шалан Сулаймон (БАА). – Ўзбекистонлик ҳамкасбларимиз билан бир неча йилдан бери ҳамкорлик қилиб келамиз. Бирлашган Араб Амирликларида Ўзбекистон халқининг бой маданияти, тарихи ва бугунги тараққиёти билан танишишга қизиқиш юқори. Ярмаркада мамлакатларимиз ўртасида сайёҳлар алмашинувини янада кенгайтириш бўйича Ўзбекистоннинг қатор сайёҳлик компаниялари билан ҳамкорлик ўрнатдик. Мамлакатингизда компаниямиз ваколатхонасини очишни режалаштирганмиз. 

Халқаро ярмарка доирасида “Маданий меросни асраш Ўзбекистон сайёҳлик соҳаси ривожининг муҳим омили” мавзусида халқаро конференция ҳам бўлиб ўтди. Бир қанча мамлакатлар ва шаҳарларнинг сайёҳлик салоҳиятига бағишланган тақдимотлар, соҳага оид амалий семинарлар ўтказилди. 

Тошкент халқаро сайёҳлик ярмаркаси доирасида қатор йўналишлар бўйича сайёҳлик соҳасининг энг яхши ва фаол ғолиблари аниқланди ва тақдирланди.