Аския – номоддий маданий мерос рўйхатига кириш учун номзодлик қилмоқда

Шу йилнинг 24—28 ноябрь кунлари Париж шаҳрида ЮНЕСКОнинг номоддий маданият меросни муҳофаза қилиш қўмитасининг тўққизинчи сессияси бўлиб ўтади, дея хабар бермоқда uz24.uz.

Бу йил Инсониятнинг номоддий мероси рўйхатидаги 46 та номзодлар, хусусан, ўзбек аския санъати ҳам кўриб чиқилади.

Аския – ўзбек халқ оғзаки ижоди жанри бўлиб, унда импровизация, қочирим ва катта маҳорат муҳим ўрин тутади. Аскияда иштирок этиш учун тили ўткирлик, ҳазил-мутойибага усталик, бадиҳагўйлик талаб этилади. Унда иштирокчилар бир-бирига ёнма-ён ёки қарама-қарши туришиб, рақиб томондан берилган саволга тез, лўнда, кулгили жавоб беришга харакат қилади.

ЮНЕСКО ташкилотининг матбуот хизхмати хабар беришича, бу йил номоддий маданий мерос рўйхатига Қозоғистондаги дўмбира куйини чалиш санъати, қозоқ ва қирғиз ўтовларини тайёрлаш малакаси ҳам киритилган.

Маълумот ўрнида, ЮНЕСКО томонидан 2001 йилдан бери Инсониятнинг номоддий мероси ва оғзаки ижоди дурдона сифатида эълон қилиниб келинади. Шу кунга қадар 88 мамлакатнинг 300 та дурдонаси – урф-одат, аньана, байрам, таом, халқ оғзаки ижоди, қўшиқ, рақслари  Инсониятнинг Номоддий Мероси рўйхатига киритилган.

Жумладан ўзбекларнинг Катта Ашуласи (2009), Наврўз (2009), “Шошмақом” (2003, 2008), Бойсун маданияти (2001, 2008) бу рўйхатга киритилганлигини эслатиб ўтиш керак.